Kuvendi i Kosovës miratoi me 80 vota pro dhe asnjë kundër Ligjin për Sigurimin e Detyrueshëm të Kujdesit Shëndetësor, një prej reformave më të rëndësishme në sektorin e shëndetësisë. Ministri i Shëndetësisë, Arben Vitia, falënderoi deputetët për mbështetjen dhe theksoi se ky ligj krijon barazi në qasje shëndetësore, siguron financim të qëndrueshëm për sistemin dhe ofron mbrojtje më të madhe financiare për qytetarët. Ky projektligj pritet të ndryshojë rrënjësisht mënyrën se si financohet dhe ofrohet kujdesi shëndetësor në Kosovë, duke përmirësuar ndjeshëm mbrojtjen sociale dhe shëndetësore të popullsisë. Miratimi i tij shënon një hap të rëndësishëm drejt avancimit të shëndetësisë publike dhe përmirësimit të kushteve për qytetarët në të gjithë vendin.