Zëvendëskryeministrja dhe Ministrja e Drejtësisë në detyrë, Donika Gërvalla, priti në takim kortezie Shefin e ri të Misionit të EULEX-it në Kosovë, Antero Lopes. Në këtë takim u diskutua thellimi i reformave në drejtësi dhe forcimi i sundimit të ligjit, ku u theksua rëndësia e vendosmërisë politike dhe integritetit institucional për suksesin e këtyre proceseve. Ministrja Gërvalla përmendi funksionalizimin e Byrosë Shtetërore për Verifikimin dhe Konfiskimin e Pasurisë së Pajustifikueshme, procesin e Vetingut dhe miratimin e pakos ligjore si hapa kyç për luftën kundër korrupsionit dhe krimit. Gjithashtu, u diskutua bashkëpunimi i ngushtë me EULEX-in në monitorimin e trajtimit institucional të rasteve të dhunës në familje dhe dhunës me bazë gjinore, me fokus në mbrojtjen e viktimave dhe përgjegjshmërinë institucionale. Në përmbyllje, Ministrja Gërvalla i uroi sukses shefit të ri të EULEX-it në detyrën e tij.