Ministrja në detyrë e Drejtësisë, Donika Gërvalla, ka vizituar degët e Gjykatave Themelore në Drenas dhe Skenderaj, ku ka diskutuar me gjyqtarët dhe stafin për performancën, ngarkesën me lëndë dhe masat për rritjen e efikasitetit në trajtimin e rasteve. Ajo ka theksuar rëndësinë e një sistemi gjyqësor efikas dhe funksional, duke nënvizuar se vonesat në drejtësi ndikojnë negativisht në besimin e qytetarëve ndaj institucioneve të shtetit. Gërvalla ka përmendur se reforma në drejtësi, bashkëpunimi ndërinstitucional dhe transparenca janë elemente kyçe për ndërtimin e një drejtësie profesionale dhe të përgjegjshme. Ajo ka theksuar se reforma është e paalternativë dhe se pandëshkueshmëria nuk mund të jetë opsion, duke e lidhur drejtpërdrejt me forcimin e shtetit dhe konsolidimin e Republikës së Kosovës.