Hulumtuesi i lartë i Institutit të Kosovës për Drejtësi (IKD), Qemajl Marmullakaj, ka deklaruar se Strategjia për Sundimin e Ligjit, e prezantuar si reforma më ambicioze në sektorin e drejtësisë pas pavarësisë, nuk ka arritur të përmbushë pritjet dhe vazhdon të përballet me vonesa dhe mungesë koordinimi. Raporti i publikuar nga IKD për vitin 2025 tregon se progresi në zbatim ka qenë i kufizuar dhe i pabarabartë, me shumë aktivitete që kanë mbetur në faza fillestare ose janë pjesërisht të zbatuara. Marmullakaj thekson se pas më shumë se katër viteve, reforma nuk ka sjellë ndryshimet e synuara në efikasitetin, integritetin dhe besimin e qytetarëve në institucionet e drejtësisë. Kjo situatë reflektohet në vonesat, ri-planifikimet e dobëta dhe mungesën e koordinimit ndërmjet institucioneve përgjegjëse për zbatimin e strategjisë.