Demokracia në Veprim ka vlerësuar se procesi zgjedhor i 7 qershorit 2026 u zhvillua në mënyrë të qetë, konkurruese dhe të rregullt, pa incidente që të cenonin integritetin e tij. Megjithatë, pjesëmarrja e ulët dhe lodhja e votuesve ishin të dukshme për shkak të zgjedhjeve të shumta brenda një periudhe të shkurtër, ndërsa u evidentuan probleme të përsëritura si mungesa e rregullimit të parafushatës, transparenca e pamjaftueshme e financimit politik dhe vështirësitë për votuesit, përfshirë ata me aftësi të kufizuara. DnV po finalizon raportet përfundimtare me rekomandime të detajuara për institucionet përgjegjëse dhe i bën thirrje Kuvendit të ardhshëm që reforma zgjedhore të jetë prioritet kryesor. Reforma duhet të jetë gjithëpërfshirëse dhe të adresojë jo vetëm aspektet teknike, por edhe sfidat që ndikojnë në përfaqësim, barazi dhe besim publik.