Deputeti Shaip Kamberi nga Lugina e Preshevës së bashku me deputetë të tjerë nga SDA Sandzaku kanë propozuar në Kuvendin e Serbisë një rezolutë për dënimin e krimeve të kryera në Kosovë gjatë viteve 1998-1999. Rezoluta dënon krimet sistematike, vrasjet, deportimet dhe spastrimin etnik ndaj popullsisë civile shqiptare, duke përmendur masakrat në Reçak, Mejë, Krushë të Madhe e vende të tjera, si dhe ekzistencën e varrezave masive në disa lokacione. Dokumenti kërkon hapjen e arkivave shtetërore dhe ushtarake, vazhdimin e hetimeve për personat e zhdukur dhe garantimin e së drejtës për të vërtetën dhe drejtësinë për familjet e viktimave. Kamberi thekson se pranimi i së vërtetës nuk është dënim për qytetarët serbë, por një hap drejt ndërtimit të paqes, besimit dhe pajtimit në rajon, duke e cilësuar ballafaqimin me të kaluarën si një obligim moral dhe juridik për çdo shoqëri demokratike.