Kryetari i komunës së Wylies në Teksas, Gjino Mulliqi, ka komentuar dy rezolutat e fundit të paraqitura në Dhomën e Përfaqësuesve të SHBA-së, të cilat synojnë avancimin e Kosovës drejt anëtarësimit në NATO dhe forcimin e sigurisë në Ballkanin Perëndimor. Mulliqi theksoi se këto iniciativa janë pjesë e një angazhimi të vazhdueshëm të faktorit shqiptaro-amerikan në bashkëpunim me kongresmenë amerikanë, me qëllim që Kosova të luajë një rol stabilizues në rajon. Ai gjithashtu vuri në dukje rëndësinë e pranisë së trupave të KFOR-it në Kosovë dhe përpjekjet për të parandaluar tërheqjen e tyre, duke përmendur shqetësimet lidhur me planet e administratës Trump për tërheqjen e trupave nga Gjermania. Mulliqi komentoi edhe reagimet nga Serbia, duke thënë se presidenti serb Aleksandër Vuçiq nuk është përballur më parë me një angazhim kaq të madh të shqiptaro-amerikanëve në Uashington, dhe se kjo nuk i pëlqen atij, por faktori shqiptaro-amerikan do të vazhdojë të mbrojë interesat e Kosovës pavarësisht zhvillimeve politike.