Kryeministri në detyrë i Kosovës, Albin Kurti, së bashku me ushtruesen e detyrës së Presidentes, Albulena Haxhiu, morën pjesë në rihapjen e Galerisë Kombëtare të Kosovës pas një procesi të gjerë renovimi. Ky projekt, me një investim prej mbi 1.6 milion eurosh, përfshiu modernizimin e infrastrukturës dhe shtimin e 400m2 hapësirë depozituese sipas standardeve ndërkombëtare për ruajtjen e veprave artistike. Kurti theksoi se investimi në kulturë nuk është luks, por domosdoshmëri për ruajtjen e kujtesës kolektive, edukimin dhe zhvillimin e shoqërisë kosovare, duke e parë këtë hapësirë si një investim afatgjatë për brezat e ardhshëm. Ai falënderoi të gjithë ata që kontribuuan në realizimin e projektit dhe shprehu shpresën që galeria e rinovuar të bëhet një vend ku arti dhe publiku takohen për dialog, krijimtari dhe reflektim.