Analisti politik Avdi Smajljaj ka theksuar se moskandidimi i Vjosa Osmanit për presidente nga Lëvizja Vetëvendosje mund të jetë pasojë e rivalitetit në rritje mes saj dhe kryeministrit Albin Kurti. Fillimisht, Osmani dhe Kurti kishin një bashkëpunim të fortë politik, por me kalimin e kohës raportet janë përkeqësuar, duke ndikuar në vendimin e VV-së për të mos e mbështetur Osmanin si kandidate. Smajljaj përmend edhe aktivitetet ndërkombëtare të Osmanit, përfshirë takimet me presidentin amerikan Donald Trump, si faktorë që mund të kenë tensionuar marrëdhëniet mes tyre. Ai shton se mungesa e vullnetit brenda Listës Guxo, partia e krijuar nga Osmani, për të qenë më këmbëngulëse në këtë proces, gjithashtu ka ndikuar në këtë vendim.