Rrjeti i organizatave të shoqërisë civile për arsimin parauniversitar, ROSCAP, i ka bërë thirrje Kuvendit të Kosovës që të mos votojë listën e propozuar për anëtarët e Bordit të Agjencisë së Kosovës për Akreditim, duke e konsideruar procesin të komprometuar dhe të dyshimtë. Një nga arsyet kryesore të këtij reagimi është përfshirja e emrit të Driton Velës, ish-kandidat për deputet nga Vetëvendosje, i cili më parë ishte diskualifikuar për deklarime të pasakta në aplikim. ROSCAP paralajmëron se miratimi i kësaj liste do të përbënte ndërhyrje të rëndë në pavarësinë e Agjencisë dhe do të rrezikonte pozitën e saj në mekanizmat ndërkombëtarë të sigurimit të cilësisë, duke përfshirë ENQA dhe EQAR.