Ministri në detyrë i Ministrisë për Punë, Familje dhe Vlerat e Luftës Çlirimtare, Andin Hoti, ka miratuar dy udhëzime administrative të reja që synojnë përmirësimin e shërbimeve sociale dhe familjare në Kosovë. Udhëzimet përcaktojnë kushtet minimale për themelimin e institucioneve të shërbimeve sociale, si dhe procedurat për dhënien, përsëritjen, pezullimin dhe marrjen e licencave për ofruesit e këtyre shërbimeve. Këto masa synojnë të vendosin rregulla më të qarta për institucionet publike, organizatat joqeveritare dhe institucionet private që operojnë në këtë fushë. Ministri Hoti thekson se ky është një hap i rëndësishëm për zbatimin e Ligjit për Shërbime Sociale dhe Familjare, duke garantuar shërbime më cilësore, më të sigurta dhe me standarde të njëjta për qytetarët.