Në Kosovë po afrohet afati për zgjedhjen e presidentit të ri, por ende nuk është përcaktuar kandidati që do të marrë votat e mjaftueshme në Kuvend. Nëse nuk arrihet zgjedhja e presidentit deri të enjten, ekziston rreziku që vendi të shkojë në zgjedhje të parakohshme, pasi Kushtetuta parashikon shpërndarjen e Kuvendit nëse brenda 60 ditëve nga fillimi i procedurës nuk zgjidhet presidenti. Juristi Ardian Bajraktari thekson se mungesa e një sanksioni kushtetues të qartë hap mundësinë për ankesa në Gjykatën Kushtetuese dhe për kalkulime politike lidhur me këtë afat. Profesori i të drejtës kushtetuese, Mazllum Baraliu, shpjegon se shpërndarja e Kuvendit do të ndodhë nëse brenda 60 ditëve nuk arrihet zgjedhja, por ai paralajmëron se zgjedhjet e reja nuk janë zgjidhje e mirë dhe do të përforcojnë perceptimin negativ të qytetarëve për klasën politike.