Bashkimi Demokratik për Integrim ka reaguar ashpër ndaj rritjes së çmimeve të transportit ndërurban, duke theksuar se kjo masë rëndon veçanërisht mbi studentët dhe qytetarët që udhëtojnë çdo ditë. Nga Tetova drejt Shkupit, bileta është rritur nga 200 në 250 denarë, një rritje prej 25%, që përkthehet në një barrë financiare të konsiderueshme mujore për udhëtarët e rregullt. Sipas BDI-së, shpenzimet mujore për transport janë rritur nga 5.500 në 6.500 denarë, duke shtuar presionin mbi buxhetet familjare dhe duke vënë në pikëpyetje politikat aktuale të pushtetit për kujdes ndaj qytetarëve. Partia kërkon nga institucionet kompetente sqarim publik për arsyet e kësaj rritjeje dhe masa për mbrojtjen e kategorive më të prekura, duke theksuar se qytetarët nuk duhet të paguajnë për dështimet e pushtetit.