Gjatë vitit 2025, numri i kontratave për shërbime të veçanta në komunat e Kosovës u rrit ndjeshëm, duke arritur në 534 kontrata, nga 381 në vitin 2024, që përbën një rritje prej rreth 40 për qind. Komuna e Prishtinës shënoi rritjen më të madhe, me një shtim prej 134 kontratash, duke kaluar nga 73 në 207 angazhime gjatë një viti. Rritje të dukshme pati edhe në Zveçan, Obiliq dhe Pejë, ndërsa disa komuna si Gjilani, Malisheva dhe Viti regjistruan ulje të numrit të këtyre kontratave. Instituti GAP thekson se këto kontrata janë për periudha më të shkurtra se gjashtë muaj dhe realizohen përmes një procedure më të thjeshtuar rekrutimi, duke reflektuar një trend të qartë të rritjes së angazhimeve me kontrata të përkohshme në nivel lokal.