Kandidati i Partisë Demokratike të Kosovës, Bedri Hamza, premtoi në një tubim elektoral në Gjilan se në qeverinë e tij do të ketë një rritje prej 50 për qind të pagave për të gjithë punonjësit që paguhen nga buxheti i shtetit. Kjo rritje do të përfshijë sektorë të ndryshëm si arsimi, shëndetësia, siguria, administrata publike dhe sektorë të tjerë publikë. Hamza përmendi konkretisht mësuesit, mjekët, zjarrfikësit, ushtarët dhe shërbyesit civilë si përfitues të kësaj rritjeje. Ai theksoi se, pavarësisht se vendi ndodhet në fushatë zgjedhore, qytetarët mund t’u besojnë zotimeve të PDK-së, duke theksuar se kjo parti mban fjalën e dhënë.