Rrjeti i Grave të Kosovës (RrGK) i është drejtuar Qeverisë në detyrë me një kërkesë urgjente për sigurimin e financimit emergjent dhe zgjidhjeve afatgjata për funksionimin e pandërprerë të strehimoreve që mbrojnë gratë dhe fëmijët viktima të dhunës në familje dhe dhunës me bazë gjinore. Sipas RrGK-së, mungesa e mbështetjes financiare po rrezikon seriozisht funksionimin e këtyre institucioneve, duke lënë viktimat të ekspozuara ndaj pasigurisë dhe rrezikut. Ministria për Punë, Familje dhe Vlera të Luftës Çlirimtare ka hapur një thirrje publike për mbështetje financiare, por vonesat në procedurat e vlerësimit dhe disbursimit krijojnë një boshllëk kritik financiar gjatë muajit maj, periudhë kur strehimoret mund të mbeten pa mjete për shpenzimet operative dhe pagat. RrGK kërkon nga institucionet të sigurojnë financim emergjent për majin, të krijojnë mekanizma të përkohshëm për periudhat tranzitore dhe të ndërmarrin hapa për një model të qëndrueshëm financimi shumëvjeçar, duke theksuar përgjegjësinë morale dhe ligjore të shtetit për mbrojtjen e këtyre viktimave.