Arben Fetoshi, drejtor i Institutit Octopus, ka komentuar nismën e fundit të Dhomës së Përfaqësuesve të SHBA-së për anëtarësimin e Kosovës në NATO, duke e cilësuar atë si një hap të rëndësishëm drejt sigurimit të paqes së qëndrueshme në Ballkanin Perëndimor. Rezoluta e paraqitur nga kongresistët amerikanë Keith Self, Ritchie Torres dhe Mike Lawler konfirmon qasjen strategjike të SHBA-ve për stabilitetin rajonal dhe përbën një mekanizëm për neutralizimin e kërcënimeve hibride nga Serbia dhe ndikimit të mundshëm rus. Fetoshi thekson se anëtarësimi i Kosovës në NATO është jo vetëm një aspiratë kombëtare, por edhe një instrument parandalues që eliminon kalkulimet destabilizuese dhe mbyll hapësirën e ndikimit rus në rajon. Ai gjithashtu përmend sfidat e vazhdueshme, si mungesën e njohjes së Kosovës nga disa vende anëtare të NATO-s, që krijojnë hapësira për ndikim të jashtëm, duke theksuar rëndësinë e vazhdimit të përpjekjeve për integrimin e Kosovës në strukturat ndërkombëtare.