Deputeti i Lëvizjes Vetëvendosje, Adnan Rrustemi, ka theksuar se vullneti i 120 deputetëve të Kuvendit të Kosovës nuk duhet të mbahet peng nga vonesa apo nga komisionet parlamentare në procesin e ndryshimit të Kushtetutës për zgjedhjen e presidentit nga populli. Ai mbrojti idenë e presidentes Vjosa Osmani për dërgimin e amendamenteve në seancë plenare, edhe pse me vonesë prej 14 vjetësh, duke theksuar se vendimi përfundimtar i takon deputetëve që të votojnë ose jo. Rrustemi nënvizoi se komisionet parlamentare janë vetëm trupa ndihmëse të Kuvendit dhe nuk duhet të shërbejnë si filtra që pengojnë vendimmarrjen në seancë. Ai shtoi se mbledhja e Komisionit për Legjislacion është e dobishme, por nuk duhet të jetë pengesë për realizimin e vullnetit të deputetëve në Kuvend.