Ambasadori gjerman në Kosovë, Rainer Rudolph, ka theksuar rëndësinë e institucioneve të qëndrueshme për të avancuar agjendën evropiane dhe për të thelluar bashkëpunimin me partnerët ndërkombëtarë. Ai nënvizoi se partnerët politikë duhet të veprojnë në interes të Kosovës dhe të mbështesin stabilitetin institucional për të vazhduar punën në agjendën ekonomike, politike dhe të sigurisë. Rudolph theksoi gjithashtu se bashkëpunimi ekonomik dhe tregtia mes Kosovës dhe Gjermanisë janë të mira, por ka nevojë për më shumë eksporte nga Kosova drejt Gjermanisë, ndërsa bashkëpunimi zhvillimor përfshin fusha si energjia, mjedisi dhe menaxhimi i mbeturinave. Ai foli edhe për zbatimin e kujdesshëm të Ligjit për të huajt, duke kërkuar që shërbimet shëndetësore dhe arsimore të mos dëmtohen, veçanërisht për komunitetet pakicë, dhe vlerësoi rolin e diasporës kosovare në Gjermani në forcimin e lidhjeve mes dy vendeve.