Ish-deputeti i LDK-së, Driton Selmanaj, ka reaguar ashpër ndaj ekspozitës së fundit që përmban të dhëna të pasakta për masakrat në Kosovë, ku protagonist është ish-këshilltari i Albin Kurtit, Shkëlzen Gashi. Ai e konsideron këtë ekspozitë dhe zhvillimet e tjera si pjesë të një agjende të mirëplanifikuar për rishkrimin e së vërtetës historike dhe ndërtimin e një narrative që dëmton interesin kombëtar të Kosovës. Selmanaj përmend edhe glorifikimin nga Albin Kurti i figurave si Zoran Gjingjiq dhe Oliver Ivanoviq, si dhe koordinimin e Mimoza Kusarit me Milan Radojiqin, duke i lidhur këto me të njëjtën strategji. Ai thekson se kjo narrativë synon relativizimin e krimeve dhe zbehjen e sakrificës së popullit shqiptar, duke krijuar një barazim të papranueshëm mes agresorit dhe viktimës.