Më 16 shtator pritet të shpallet aktgjykimi i shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit nga Dhomat e Specializuara të Kosovës në Hagë. Ndërkohë që gjykata përgatitet për vendimin, në Serbi po rritet presioni mbi mënyrën se si interpretohet ky proces në opinionin publik, me një fokus të shtuar në mediat proqeveritare që paraqesin ish-krerët e UÇK-së në kontekstin e akuzave për krime ndaj serbëve dhe komuniteteve të tjera. Ekspertët dhe avokatët në Kosovë paralajmërojnë se kjo narrativë e njëanshme është shumë e rrezikshme dhe kërkon reagim të bazuar në fakte për të mos ndikuar në verdiktin e gjykatës. Një hulumtim i portalit serb Cenzolovka zbulon se disa tabloide proqeveritare kanë përfituar miliona euro nga fondet publike, duke fuqizuar kështu raportimet që ndikojnë në perceptimin publik për procesin dhe rolin e Gjykatës Speciale.