Marrëdhëniet mes Kosovës dhe Shteteve të Bashkuara po përballen me sfida serioze për shkak të mungesës së kompanive lobuese kosovare në Uashington dhe pezullimit të dialogut strategjik. Ndërkohë, Serbia ka intensifikuar aktivitetet e saj lobuese në kryeqytetin amerikan, duke shfrytëzuar boshllëkun diplomatik që ka krijuar Kosova. Ekspertët dhe ish-diplomatët paralajmërojnë se kjo situatë mund të jetë e pafavorshme për Kosovën, sidomos në një moment kur vendime të rëndësishme për rajonin po merren në SHBA. Ish-ambasadori amerikan në Prishtinë, Jeffrey Hovenier, ka shprehur shqetësim se Kosova mund të humbasë besimin e Uashingtonit nëse nuk rrit angazhimin institucional dhe diplomatik.