Eksperti i sigurisë Arben Fetoshi ka denoncuar një operacion të koordinuar nga Serbia për të destabilizuar situatën në veri të Kosovës dhe për të ndikuar në procesin zgjedhor të 7 qershorit. Pas dështimit të një plani për të shkaktuar incidente gjatë samitit BE-Ballkani Perëndimor në Tivat, ku autoritetet malazeze penguan hyrjen e 87 personave nga Serbia, tensionet janë zhvendosur në veri të Mitrovicës. Serbia po mobilizon strukturat ilegale dhe po nxit incidente përmes narrativave nacionaliste, me qëllim ruajtjen e kontrollit politik mbi komunitetin serb dhe pengimin e integrimit euro-atlantik të rajonit. Fetoshi thekson se presidenti serb Aleksandër Vuçiq synon kontrollin e votës së serbëve në Kosovë përmes Listës Serbe, ndërsa arrestimet e sekserëve kanë kufizuar ndikimin e Beogradit në zgjedhje, duke detyruar Serbinë të përdorë metoda të tjera destabilizuese.