Deklaratat e ish-shefit të BIA-s dhe kryetarit të Lëvizjes Socialiste, Aleksandër Vulin, janë cilësuar si kërcënim serioz për sigurinë dhe stabilitetin e Kosovës nga hulumtuesi Ridvan Emini nga Instituti “Octopus”. Vulin ka bërë thirrje që Serbia të veprojë sipas modelit të operacioneve të Mossad-it në Iran, duke targetuar politikanë dhe udhëheqës institucionalë të Kosovës, një retorikë që synon frikësimin dhe nxitjen e tensioneve ndëretnike. Emini thekson se këto deklarata janë pjesë e një strategjie destabilizuese të Beogradit, duke përmendur edhe incidente të mëparshme si ato në Banjskë (2023) dhe kanalin e Ibër-Lepencit (2024). Ai kërkon reagim të menjëhershëm dhe masa konkrete nga SHBA dhe Bashkimi Evropian, duke paralajmëruar se gjuha e Vulin reflekton edhe ndikimin rus për shkak të lidhjeve të tij me qarqet pranë Kremlinit.