Në një tryezë të organizuar për fuqizimin e zbatimit të Agjendës së Gjelbër në Kosovë, u theksua se sfida kryesore për biodiversitetin nuk qëndron te mungesa e politikave, por te zbatimi efektiv i tyre. Indira Kartallozi nga Sustainability Leadership Kosovo vuri në dukje se koordinimi i dobët ndërmjet institucioneve publike, organizatave joqeveritare dhe sektorit privat pengon avancimin e qëndrueshëm të mbrojtjes së mjedisit. Ajo gjithashtu theksoi mungesën e investimeve dhe financimit të qëndrueshëm për restaurimin e natyrës, duke theksuar se shumica e projekteve aktuale trajtojnë vetëm simptomat e problemeve. Drejtoresha ekzekutive e Kosovo Women4Women, Iliriana Jaka-Gashi, shtoi se hendeku mes politikave të mira dhe zbatimit të tyre në praktikë është i madh, dhe se dialogu mbetet rruga për të arritur rezultate konkrete në këtë fushë.