Kryetari i Aleancës, Ardian Gjini, ka reaguar ndaj parashikimeve të Fondit Monetar Ndërkombëtar për rritjen ekonomike të Kosovës, duke theksuar se shifrat nuk pasqyrojnë realitetin e vështirë të qytetarëve. Ai vuri në dukje se rritja prej rreth 4% mbështetet kryesisht në konsum dhe remitanca, pa zhvillim të qëndrueshëm në prodhim, industri dhe eksporte. Gjini paralajmëroi se nëse ritmi aktual vazhdon, Kosova do të ketë nevojë për dekada për t’u afruar me vendet e rajonit dhe Bashkimin Evropian, ndërsa inflacioni ka zbehur fuqinë blerëse të qytetarëve. Ai kërkoi një reformim të menjëhershëm të politikave ekonomike, duke përfshirë mbështetje për prodhuesit vendorë, investime në teknologji dhe krijim të vendeve të punës me vlerë të shtuar për të siguruar zhvillim afatgjatë.