Ambasada e Shteteve të Bashkuara në Prishtinë nuk ka kritikuar vendimin e Këshillit Gjyqësor të Kosovës për të mos rikthyer në detyrë gjyqtarët dhe stafin administrativ serb që kishin dhënë dorëheqje. Megjithatë, SHBA-ja ka theksuar rëndësinë e garantimit të përfaqësimit të serbëve në institucionet e Kosovës dhe ka kërkuar që ata të kenë mundësi të barabarta për pjesëmarrje në jetën politike dhe qytetare. Në një përgjigje për portalin “Kosovo Online”, ambasada ka kujtuar se Kushtetuta dhe ligjet e Kosovës sigurojnë këtë përfaqësim dhe ka bërë thirrje që Qeveria të sigurojë realizimin e këtyre të drejtave. Reagimi i SHBA-së vjen pas refuzimit të KGJK-së për të pranuar kërkesën e gjyqtarëve serbë për të tërhequr dorëheqjet dhe për t’u rikthyer në sistemin gjyqësor.