Departamenti amerikan i Shtetit ka përditësuar më 25 gusht këshillën për udhëtime në Kosovë, duke ngritur nivelin e rrezikut në pjesën veriore të vendit në nivelin 3, që do të thotë "Rishikoni udhëtimin". Kjo për shkak të tensioneve etnike dhe rrezikut nga trazirat e dhunshme civile në komunat Mitrovicë e Veriut, Leposaviq, Zubin Potok dhe Zveçan. SHBA paralajmëron gjithashtu për rrezikun nga dhuna, përfshirë sulmet terroriste dhe ndërprerjet në transport dhe shërbime të tjera thelbësore në këtë rajon. Qeveria amerikane ka mundësi të kufizuara për të ofruar ndihmë emergjente në veri, ndaj rekomandon shmangien e protestave, regjistrimin në programin Smart Traveler Enrollment Program dhe përgatitjen e planeve emergjente për largim.