Ilia Uvarov është emëruar shef i Zyrës Ndërlidhëse të Rusisë në Prishtinë, një mision që operon në kushte të veçanta diplomatike dhe pa kontroll të drejtpërdrejtë nga institucionet e Kosovës. Emri i tij figuron në një databazë të publikuar nga organizata ukrainase Molfar, ku përfshihen persona me lidhje të dyshuara me shërbimet sekrete ruse, duke e përshkruar atë si oficer të Shërbimit të Inteligjencës së Jashtme të Rusisë. Megjithëse nuk është konfirmuar në mënyrë të pavarur roli i tij, ekspertët ndërkombëtarë theksojnë se përdorimi i mbulesës diplomatike për aktivitete të inteligjencës është praktikë e zakonshme, veçanërisht nga Rusia, dhe se Kosova mund të përdoret si bazë për operacione të tilla në rajon. Zyra ruse në Kosovë ka status të veçantë, me imunitet dhe pa nevojë për viza, ndërsa aktivitetet e saj janë kryesisht të padukshme për publikun dhe autoritetet lokale, duke ngritur shqetësime për ndikimin dhe qëllimet e saj në kontekstin gjeopolitik të Ballkanit Perëndimor.