Zyra Kombëtare e Auditimit ka zbuluar një sërë parregullsish në menaxhimin financiar të Komunës së Drenasit gjatë vitit 2025, duke përfshirë rialokime të paautorizuara të mjeteve për projekte kapitale dhe procedura prokurimi të nisura pa dokumentacion të plotë. Raporti evidenton vonesa në vlerësimin e tenderëve, mosrespektim të rregullave për menaxhimin e kontratave dhe mungesë të përdorimit të platformës elektronike të prokurimit. Gjithashtu, komuna ka dështuar në inkasimin e të hyrave nga qiraja e Parkut Industrial “Boma”, duke rrezikuar humbjen e të ardhurave dhe duke reflektuar dobësi në monitorimin financiar. Auditorët kërkojnë masa urgjente për forcimin e kontrolleve të brendshme dhe respektimin e ligjit në menaxhimin e financave publike.