Shoqata e Ndërtimtarëve të Kosovës ka shprehur shqetësimin e saj të thellë për ndikimin negativ të pasigurisë politike dhe ngërçit institucional në zhvillimin e sektorit të ndërtimtarisë dhe stabilitetin makroekonomik të vendit. Në një moment kur ekonomia ka nevojë urgjente për reforma dhe investime të qëndrueshme, mungesa e stabilitetit politik po pengon realizimin e projekteve zhvillimore dhe po rrit pasigurinë për investitorët vendorë dhe të huaj. Shoqata i bën thirrje forcave politike të gjejnë një zgjidhje konsensuale për çështjet institucionale, duke shmangur zgjedhjet e parakohshme dhe duke vendosur stabilitetin institucional mbi interesat politike afatshkurtra. Ajo kërkon vendimmarrje të shpejtë dhe të qëndrueshme, politika fiskale mbështetëse për ndërtimtarinë, rritje të investimeve kapitale dhe krijimin e një klime të parashikueshme për bizneset, për të garantuar zhvillim ekonomik dhe urban të qëndrueshëm në Kosovë.