Një grup prej 22 drejtuesish të organizatave të shoqërisë civile i kanë dërguar një letër presidentes së Gjykatës Speciale në Hagë, Ekaterina Trendavilova, ku shprehin shqetësime të thella lidhur me procesin gjyqësor ndaj ish-krerëve të UÇK-së. Ata theksojnë se mënyra e trajtimit të këtij procesi nuk ka vetëm pasoja juridike, por ndikon edhe në besimin publik, marrëdhëniet ndër-etnike dhe perceptimin e drejtësisë ndërkombëtare në Kosovë. Në letër përmenden shtatë shqetësime kryesore, përfshirë kohëzgjatjen e paraburgimit prej më shumë se pesë vjetësh, pranimin e provave nga institucionet serbe, dhe perceptimin e përgjegjësisë kolektive që lidhet me UÇK-në si një ndërmarrje kriminale.