Presidenti i Shqipërisë, Bajram Begaj, priti në takim presidentin e Këshillit Evropian, Antonio Costa, ku u vlerësua progresi i vendit në procesin e negociatave për anëtarësim në Bashkimin Evropian. Gjatë takimit u theksua përmbushja e kritereve ndërmjetëse për Kapitullin 1 “Themeloret” dhe vendosmëria për të mbyllur grupkapitujt deri në vitin 2027. Begaj nënvizoi rëndësinë e reformave në drejtësi, luftën kundër korrupsionit dhe krimit të organizuar, si dhe përputhjen me politikën e përbashkët të jashtme dhe të sigurisë së BE-së, duke e cilësuar Shqipërinë si një partner të besueshëm dhe të vullnetshëm. Ai gjithashtu theksoi se anëtarësimi i Shqipërisë dhe Ballkanit Perëndimor në BE do të sjellë më shumë siguri, zhvillim ekonomik dhe stabilitet politik, duke e konsideruar këtë proces si një investim strategjik për paqen dhe sigurinë e kontinentit evropian.