Ministri i Jashtëm i Shqipërisë, Ferit Hoxha, zhvilloi një bisedë telefonike me homologun e tij kosovar, Glauk Konjufca, ku u riafirmua mbështetja e palëkundur e Shqipërisë për Kosovën si prioritet i përhershëm i politikës së jashtme shqiptare. Gjatë bisedës u theksua rëndësia e thellimit të partneritetit strategjik dhe forcimit të bashkëpunimit në fusha të ndryshme si ekonomia, infrastruktura, arsimi, kultura, siguria dhe diplomacia. Hoxha vlerësoi zhvillimet pozitive në raportet e Kosovës me Bashkimin Evropian, përfshirë heqjen e masave kufizuese, duke e cilësuar këtë një hap të rëndësishëm drejt avancimit evropian të Kosovës dhe pritshmërinë për marrjen e statusit të vendit kandidat. Po ashtu, u riafirmua mbështetja për forcimin e subjektivitetit ndërkombëtar të Kosovës, duke përfshirë zgjerimin e njohjeve dhe anëtarësimin në organizata ndërkombëtare, si dhe angazhimi për riaktivizimin e mekanizmave institucionalë dhe avancimin e projekteve madhore të përbashkëta.