Kryeministri Edi Rama mori pjesë në forumin europian të inovacionit dhe sipërmarrjes “Ruhr Summit”, ku prezantoi vizionin e tij mbi transformimin e konceptit të pushtetit në epokën digjitale. Ai theksoi se sot pushteti nuk matet më me forcë fizike apo pasuri, por me inteligjencë dhe informacion, duke e quajtur këtë ndryshim një “revolucion të heshtur”. Rama përshkroi Shqipërinë si një “laborator të vogël inteligjent” në Evropë, duke nënvizuar rëndësinë e dijes si lëndë të parë në botën moderne. Ai theksoi se inteligjenca dhe informacioni shpërndahen në mënyrë të barabartë, pavarësisht madhësisë gjeografike të vendeve, duke ndryshuar rrënjësisht mënyrën se si kuptohet dhe ushtrohet pushteti sot.