Ministria e Shëndetësisë ka vendosur të vazhdojë edhe këtë vit shtesën mujore prej 150 eurosh për mjekët që punojnë në sektorin publik shëndetësor. Ky vendim është mirëpritur nga Oda e Infermierëve, Mamive dhe Profesionistëve të tjerë Shëndetësorë të Kosovës (OIK), e cila megjithatë kërkon që të mos anashkalohet stafi tjetër shëndetësor në përfitimet financiare. OIK thekson se ka kërkuar prej kohësh që infermierët, mamitë dhe profesionistët e tjerë të përfshihen në skemat mbështetëse dhe kërkon trajtim të barabartë për të gjitha profesionet shëndetësore. Në reagim, Oda shpreh gatishmërinë për bashkëpunim me institucionet për të gjetur zgjidhje që motivojnë dhe mbështesin të gjithë punonjësit e sistemit shëndetësor.