Qeveria në detyrë ka miratuar ndarjen e 1 milion eurove për kuponë ushqimi për familjet në nevojë, si dhe një mbështetje të njëhershme prej 100 eurosh për fëmijët, pensionistët, studentët dhe punëtorët e sektorit privat. Kandidati i AAK-së për deputet, Avni Arifi, e ka cilësuar këtë veprim si një tentativë të qartë për blerje votash, duke theksuar se është hera e katërt që kryeministri në detyrë, Albin Kurti, ndan ndihma financiare para zgjedhjeve. Ai ka kritikuar përdorimin e këtyre mjeteve si një mënyrë për të korruptuar qytetarët dhe ka kërkuar që në vend të ndihmave të përkohshme të ketë rritje të qëndrueshme të pagave dhe pensioneve. Arifi ka theksuar se qytetarët po keqkuptojnë këto fonde, të cilat sipas tij janë të shtetit dhe jo personale të kryeministrit, dhe se kjo praktikë do të ketë kosto për të gjithë në të ardhmen.