Ministri për Evropën dhe Punët e Jashtme, Ferit Hoxha, ka njoftuar për avancimet e mëdha në shërbimet konsullore të Shqipërisë, duke theksuar transformimin teknologjik dhe përmirësimin e cilësisë dhe shpejtësisë së tyre. Gjatë periudhës 2017–2026 janë administruar mbi 1.3 milion shërbime konsullore dhe miliona legalizime, ndërsa aplikimet për e-Visa kanë kaluar 203 mijë që nga viti 2021. Një nga risitë më të rëndësishme është krijimi i Asistentit Virtual, i cili do të jetë i disponueshëm 24/7 për të orientuar qytetarët dhe për të marrë vlerësime për shërbimet e ofruara. Po ashtu, shumë shpejt do të nisë edhe Prania Diplomatike Virtuale, që do të ofrojë shërbime konsullore në vendet ku Shqipëria nuk ka përfaqësim fizik, duke e bërë shtetin më pranë qytetarit në çdo kohë dhe vend.