Akademiku Ali Aliu ka shpjeguar se represioni ndaj shqiptarëve në Maqedoni shërbeu si një lloj “poligoni” ku Beogradi testonte forma të ndryshme të dhunës dhe torturës përpara se t’i aplikonte më pas në Kosovë. Ai përmendi masa konkrete si ndërtimin e mureve rrethuese për shtëpi dhe oborre, kufizimin e këngëve dhe emërtimeve shqipe, si dhe sllavizimin e toponimeve, duke sjellë shembullin e detyrimit për përdorimin e emrit maqedonas “Tetovo” në vend të “Tetovë”. Aliu theksoi se këto masa ishin prezente edhe para vitit 1981 dhe u reflektuan në kufizimet kulturore dhe gjuhësore ndaj shqiptarëve. Kjo analizë u bë gjatë një bisede me publicistin Veton Surroi në podcastin “PIKË”, ku u diskutua edhe perceptimi për intensitetin e represionit në Maqedoni krahasuar me viset e tjera shqiptare.