Instituti Demokratik i Kosovës (KDI) organizoi një tryezë diskutimi për forcimin e integritetit politik përmes digjitalizimit, ku u prezantuan sfidat ligjore, institucionale dhe teknologjike që pengojnë llogaridhënien efektive të zyrtarëve publikë. Pavarësisht kornizës ligjore relativisht të avancuar, të dhënat për integritetin politik mbeten të fragmentuara dhe jo të ndërlidhura, duke kufizuar transparencën dhe analizën e tyre. Përfaqësues institucionalë theksuan se digjitalizimi nuk është më një opsion, por një domosdoshmëri për rritjen e efikasitetit qeverisës dhe transparencës, ndërsa theksuan nevojën për bashkëpunim ndërinstitucional dhe përdorim aktiv të të dhënave. KDI kërkon veprime konkrete, përfshirë avancimin e kornizës ligjore dhe implementimin e parimit “open-by-default”, për të mundësuar një transparencë reale dhe për të parandaluar korrupsionin në sektorin publik.