Komisioni Qendror i Zgjedhjeve (KQZ) ka përfunduar numërimin fillestar të të gjitha fletëvotimeve dhe tani po pret afatin ligjor për pranimin e ankesave nga subjektet politike, të cilat mund të dorëzohen brenda 48 orëve nga momenti i supozuar i shkeljes. Nëse nuk ka ankesa, KQZ do të shpallë rezultatet përfundimtare, ndërsa në rast të kundërt, do të presë vendimet e organeve kompetente dhe do t’i zbatojë ato ligjërisht. Një nga masat e marra për të garantuar saktësinë e numërimit është rinumërimi i deri në 10% të vendvotimeve, veçanërisht atyre që janë numëruar paraprakisht në Qendrat Komunale të Numërimit. KQZ synon të përfundojë shpalljen e rezultateve deri më 26 qershor dhe certifikimin deri më 6 korrik, me shpresën që procesi të përshpejtohet përtej këtyre afateve.