Profesori amerikan Timothy Waters, ekspert i së drejtës penale ndërkombëtare, ka analizuar procesin ndaj Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës në Hagë. Ai shpjegon se, ndonëse në gjykim janë vetëm katër individë, teoria juridike e “ndërmarrjes së përbashkët kriminale” që përdor Prokuroria mund të ketë implikime shumë më të gjera, duke lidhur të akuzuarit me krime që nuk pretendohet se kanë kryer drejtpërdrejt. Waters thekson se sfida kryesore në këtë rast është dëshmimi i lidhjes mes krimeve të kryera dhe personave në bankën e të akuzuarve, duke vënë në dukje se kjo teori është shpesh e debatueshme dhe mund të krijojë përgjegjësi të gjerë. Ai gjithashtu parashikon se një vendim fajësie do të ketë ndikime të mëdha politike në rajon, por nuk do të ndryshojë domosdoshmërisht mënyrën se si shoqëritë e perceptojnë historinë e luftës, duke sugjeruar se përballja me të kaluarën kërkon procese më të gjera shoqërore dhe kulturore.