Kryeministri në detyrë i Kosovës, Albin Kurti, ka prezantuar idenë e mbrojtjes gjithëpërfshirëse, duke marrë si shembull modelin e Finlandës dhe vendeve baltike, ku qytetarët marrin role konkrete në mbrojtjen e vendit në raste emergjencash, pa u fokusuar në shërbimin e detyrueshëm ushtarak tradicional. Ky koncept, i miratuar në Programin Kombëtar për Mbrojtje Gjithëpërfshirëse në vitin 2024, synon që shoqëria të jetë e përgatitur për të reaguar ndaj kërcënimeve të ndryshme, duke përfshirë fatkeqësitë natyrore dhe sulmet e armatosura, me mbështetjen vullnetare të qytetarëve dhe strukturave shtetërore.