Drejtori i Përgjithshëm i Shërbimit Korrektues të Kosovës, Ismail Dibrani, së bashku me Drejtorin e Përgjithshëm të Shërbimit Sprovues, Arsim Tahiri, kanë zhvilluar një takim me Këshilltarin Rajonal të BE-së për Çështjet e Kundërterrorizmit, Eddy Greif. Gjatë takimit u diskutuan programet rehabilituese dhe risocializuese për të burgosurit e dënuar për vepra që lidhen me terrorizmin dhe për personat me ideologji radikale brenda sistemit korrektues. Fokus u vu edhe në instrumentet për vlerësimin e rrezikut dhe përmirësimin e mekanizmave institucionalë për parandalimin e radikalizmit dhe rritjen e sigurisë në institucionet korrektuese. Po ashtu, u theksua rëndësia e bashkëpunimit ndërinstitucional dhe mbështetjes ndërkombëtare për zhvillimin e programeve profesionale të rehabilitimit dhe riintegrimit.