Kryetari i Komunës së Prishtinës, Përparim Rama, ka njoftuar se rreth 100 familje që janë pjesë e skemës së asistencës sociale furnizohen çdo muaj me produkte esenciale përmes Dyqanit të Bamirësisë në kryeqytet. Ai ka vizituar këtë dyqan dhe ka bërë të ditur përfundimin e inventarizimit të plotë, i cili synon të përmirësojë organizimin, transparencën dhe efikasitetin e funksionimit të tij. Ky projekt realizohet në bashkëpunim me organizatën bamirëse Bereqeti, të cilën Rama e falënderoi për partneritetin dhe përkushtimin e vazhdueshëm. Përmes këtij shërbimi, familjet në nevojë marrin mbështetje të rëndësishme për të lehtësuar barrën e përditshme.