Komisioni Qendror i Zgjedhjeve (KQZ) ka publikuar udhëzimet zyrtare për mënyrën e plotësimit të fletëvotimit në zgjedhjet e parakohshme që do të mbahen më 7 qershor. Sipas KQZ-së, votuesit duhet të sigurohen që fletëvotimi të jetë i vulosur në pjesën e pasme para se ta plotësojnë. Në anën e majtë të fletëvotimit duhet të shënohet vetëm një subjekt politik, ndërsa në anën e djathtë mund të zgjidhen deri në dhjetë kandidatë të atij subjekti. Pas plotësimit, fletëvotimi duhet të paloset dhe të vendoset në kutinë e votimit për të qenë i vlefshëm.