Komisioni Qendror i Zgjedhjeve (KQZ) ka vendosur të vazhdojë bashkëpunimin me kompaninë sllovene CETIS për shtypjen e fletëvotimeve në zgjedhjet e 7 qershorit, megjithëse kjo kontratë është dukshëm më e shtrenjtë se ato të zgjedhjeve të kaluara. Oferta fillestare e CETIS ishte 418 mijë euro, por pas negociatave u ul në 342 mijë euro, që gjithsesi është rreth 63 mijë euro më shumë se kontrata e zgjedhjeve parlamentare të shkurtit 2025. Procedura e prokurimit u zhvillua në mënyrë të shpejtë dhe me negociim pa publikim të njoftimit, ndërsa më parë ishte anuluar një tender për mungesë ofertash. Organizata INPO ka ngritur dyshime për paqartësitë në proces, duke vënë në pikëpyetje mënyrën e prezantimit të vlerës së kontratës dhe shpejtësinë e arritjes së marrëveshjes me të njëjtin operator ekonomik.