Në ditët e fundit, disa media pro-qeveritare në Serbi kanë raportuar për një “top zjarri” të hedhur nga territori i Kosovës drejt Serbisë Qendrore, duke e paraqitur ngjarjen si një sulm terrorist. Presidenti serb Aleksandar Vuçiq deklaroi se autoritetet serbe kanë gjetur një pajisje me parashutë në zonën e Bërnjakut, për të cilën dyshohet se është hedhur nga Kosova me qëllim shkaktimin e zjarrit, por hetimet vazhdojnë. Policia e Kosovës mohoi kategorikisht këto pretendime, duke theksuar se asnjë armë apo pajisje e tillë nuk është përdorur nga institucionet e saj dhe duke i cilësuar lajmet si dezinformata. Kjo ngjarje ka marrë vëmendje edhe në mediat e rajonit, ndërsa Policia Kufitare e Kosovës vazhdon patrullimet dhe bashkëpunimin me KFOR-in për sigurinë në zonën kufitare.