Tri sindikatat kryesore të Radio Televizionit të Kosovës, Sindikata e Pavarur e RTK-së, Sindikata e Punëtorëve të RTK-së dhe Shoqata Sindikale e Radio Kosovës, kanë paralajmëruar protesta që do të fillojnë të martën në orën 12:00 para ndërtesës së RTK-së. Këto organizata sindikale reaguan ndaj gjendjes së rëndë financiare dhe mosrealizimit të pagave për punëtorët, duke kërkuar përgjegjësi nga Bordi dhe Menaxhmenti të RTK-së për neglizhencën e tyre. Sindikatat theksuan se vonesa në pagesa po vështirëson jetesën e punëtorëve dhe po krijon pasiguri sociale, duke u bërë e pamundur për ta të përmbushin nevojat bazike jetësore. Ata gjithashtu nënvizuan se punëtorët nuk duhet të paguajnë për pasojat e menaxhimit të dobët dhe kërkuan që institucionet të marrin masa për zgjidhjen e krizës financiare në transmetuesin publik.