Bashkimi i Sindikatave të Pavarura të Kosovës (BSPK) ka mirëpritur konstituimin e Qeverisë së Republikës së Kosovës dhe prezantimin e kabinetit qeveritar, duke shprehur pritje për një bashkëpunim më të madh ndërmjet institucioneve dhe partnerëve socialë. Sindikata ka vlerësuar pozitivisht zotimet e Qeverisë për përmirësimin e pozitës ekonomike dhe sociale të punëtorëve, përfshirë pagën e 14-të për sektorin publik dhe mos tatimin e pagës minimale prej 500 eurosh, por ka theksuar rëndësinë e zbatimit konkret të këtyre premtimeve. BSPK ka kërkuar përfundimin e konstituimit të Këshillit Ekonomiko-Social (KES) dhe nisjen e negociatave për Marrëveshjen e Përgjithshme Kolektive, duke e konsideruar funksionalizimin e KES-it si hap të domosdoshëm për avancimin e dialogut social. Kryetari i BSPK-së, Atdhe Hykolli, ka theksuar se demokracia funksionale kërkon përfshirjen e përfaqësuesve legjitimë të punëtorëve në hartimin e politikave publike dhe se dialogu social duhet të prodhojë rezultate konkrete për punëtorët dhe zhvillimin e vendit.